Aizawl 10th June, 2024 (Mon): Vawiin khan Special Blind School, Durtlang Venglai chuan an zirlai pathumte'n matric exam a hlawhtlinna an chan vek avangin lawmpuina programme an hmang a, School Education Department Minister Dr Vanlalthlana chuan Khuallian niin he hun hi a hmanpui.

Dr Vanlalthlana chuan zirlaite hlawhtlinna chu a ropui tiin, anmahni zirtira enkawltu Special Blind School-a thawktute chu fak an phu tih a sawi a. Zirlai hlawhtlinna chang tharte chu zirna kawng zawh chhunzawm zel tura fuihin, anmahni ang thova mit lama harsatna neite pawhin hlawhtlinna ropui tak an lo chan tawh thu a sawi a. Zirna sang ber Doctor of Philosophy zir chhuakte awmin College leh University-a thawk chhunzawmte an awm a; tun hnaiah pawh MCS Combined Competitve exam-a hlawhtlinna changte an awm tih a sawi.

Minister chuan hmathlir thui tak neih thiamna hi thinlung leh ngaihtuahna zawkah a awm tih sawiin, mit lama harsatna neih chu an nihna sawifiahtu ni lovin, taimakna leh tumruhna avanga hlawhtlinna chang chu an nihna sawifiahtu zawk niin, chu chu vawng reng turin a fuih bawk.

He hun hi Dr C Biakmawia, Senior Adviser, Samaritan Association for the Blind chuan kaihhruaiin thusawi hrang hrang ngaihthlak a nih bakah zirlai naupangte atangin zai ngaihthlak a ni a. Dr C Lalmuanthanga, Secretary, SAB chuan lawm thu sawiin Rev. Vanlalchhuanga, Vice-President, SAB chuan malsawm tawngtainain hun a khar a ni.

Special Blind School hi kum 2001-a din niin zirlai 32 chuan he school aṭang hian zir chhuak tawh a, mi 19 chuan sawrkar hna nghet an thawk tawh a ni. Engtik lai pawhin mit lama harsatna tawkte tan he school-a zir turin a enkawltute biak pawh theih reng a ni.